ATBURÐIR LÍÐANDI STUNDAR

Dómsmálaráðherra fagnar för Bandaríkjahers

2006-03-18T00:18:00.000Z

Hefur nefndin þegar komið auga á þessa vígreifu orrustuþotu sem hugsanlegan kost en hana má fá með góðum afslætti hjá ellilífeyrisþega í Svíþjóð.

"Nú þegar Bandaríski herinn er að fara að yfirgefa landið munu verða kaflaskil í sögu þjóðarinnar, en nú fyrst skapast tækifæri fyrir Ísland til að eignast sinn eigin her!" Sagði Björn Bjarnason stríðsmálaráðherra tárvotum en ljómandi augum í ræðu sinni um varnarliðsmálið á Alþingi í gær. Sagðist hann hafa hlakkað til þessa dags alla sína æfi, en hann hafi lengi dreymt um íslenskan her. Hefur Björn þegar skipað nefnd sem fara á yfir hugsanlega valkosti varðandi hernaðargögn sem stendur til að kaupa í framtíðinni fyrir íslenska lýðveldisherinn.

Þetta er þó ekki í fyrsta skipti sem Björn kaupir hernaðargögn en eins og glöggir lesendur Muddsfrétta vita festi Björn kaup á nokkrum "dómsdagstækjum" hér um árið, en sú ráðagerð fór víst út um þúfur þar sem öll tækin eyðilögðust í vonskuviðri sem gerði stuttu eftir að tækin komu til landsins.
Telur Björn þó að í þetta skipti muni það takast, þar sem hann hyggist núna kaupa tæki sem þola rigningu. Hefur nefndin þegar verið send erlendis til að skoða ýmsa valkosti, en um þessar mundir er hún í Svíþjóð, "en þar ku vera hægt að gera ansi góð kaup" eins og Björn orðaði það.
Fimm manns hafa þegar gefið vilyrði fyrir því að ganga í herinn, en þau vilyrði geta varla talist marktæk þar sem þrír þessarra aðila eru Alzheimer-sjúklingar og einn þeirra geðklofasjúklingur búsettur á Kleppi. Sá fimmti er japanskur innflytjandi sem taldi sig vera að skrá sig í Karókí keppni.

Biskup varar við kynvillingum

2006-03-03T10:39:00.000Z

Biskup var harðorður gagnvart kynvillingum í ræðu sinni.

Biskup Íslands, Herra Karl Sigurbjörnsson, hefur gefið út yfirlýsingu til aðvörunar sannkristnum einstaklingum á þeim vofeiflegu tímum er hann segir ríkja um þessar mundir.
"Kynvillingar vaða uppi um allar trissur og leitast stöðugt við að smita sannkristið og kynvíst fólk með syndsamlegu og satanísku líferni sínu." Sagði biskup í ræðu sinni á kirkjuþingi í gær og kvað það vera skyldu kirkjunnar manna að vernda fólkið í landinu gagnvart kynvillunni.

Hefur biskup af þessu tilefni gefið út fræðslubækling sem stendur til að senda á öll íslensk heimili á næstu dögum. Efni bæklingsins er m.a. leiðir til að þekkja kynvillinga frá venjulegu fólki og hins vegar ráðleggingar um það hvernig beri að forðast kynvillinga og bit þeirra. Kemur meðal annars fram í bæklingnum að kynvillingar séu næturdýr sem hafi unun af að skemmta sér og ástunda lostafull athæfi á almannafæri. Segir þar ennfremur að ef kynvillingur kemur auga á kynvísan einstakling þá reynir hann samstundis að stökkva á þann síðarnefnda, bíta hann í hálsinn og smita af kynvillubakteríunni. Til að sporna við árásum kynvillinga er fólki ráðlagt að halda sig sem mest í birtu og vera ekki á ferli einsamalt eftir myrkur.

Ný ákæra í Baugsmálinu?

2006-03-02T11:38:00.000Z

Flaskan er ábyggilega útbíuð í sóðalegum þjófafingraförum Jóns.

Rannsóknarmenn Ríkislögreglustjóra hafa loksins fundið eitthvað til að hanka Jón Ásgeir Jóhannesson, forstjóra Baugs group, en á dögunum fannst gömul kókflaska sem talið er að Jón Ásgeir hafi ekki borgað fyrir er hann vann við að fylla á goskæla í verslunum sem strákur.
"Já hann er sko hreinræktað illmenni og loksins er að komast á það sönnun." Sagði ríkislögreglustjóri hróðugur í viðtali við blaðamann. Rannsóknarstofu ríkislögreglustjóra barst fyrir skömmu nafnlaus ábending um að sönnunargögn fyrir stórfelldum auðgunarbrotum Baugsmanna væri að finna í kjallara íbúðarhúss í vesturbænum.

Þegar lögregla ásamt sérsveit ríkislögreglustjóra hafði brotist inn í íbúðina og yfirbugað öldruð hjón sem þar búa, hófst samstundis leit að einhverju sem hægt væri að "klína" á Baugsmenn og fannst loks eftir mikla leit forláta kókflaska sem eigandi hússins, fyrrum verslunareigandi að nafni Björn, viðurkenndi eftir harðar yfirheyrslur, að hann hefði varðveitt síðan Jón Ásgeir Jóhannesson gleymdi að greiða fyrir hana er hann vann við að fylla á goskæla í verslun Björns fyrir 20 árum síðan. Hafði maðurinn ákveðið að geyma flöskuna til að minna Jón Ásgeir á atvikið en gleymdi henni ofan í kassa í kjallara húss síns þar til lögreglan fékk téða ábendingu. Um þessar mundir er verið að leita fingrafara og DNA sýna Jóns á flöskunni og segir ríkislögreglustjóri vongóður að fljótlega muni verða lögð fram ný ákæra á hendur Baugsmönnum vegna þessa. "Þeir eiga pottþétt eftir að gera mig að sendiherra eða eikkvað fyrir þetta!" Sagði ríkislögreglustjóri brosandi um málið en neitaði að tilgreina hverjir þessir "þeir" séu.

Át heilan hest og annan til

2006-03-01T18:44:00.000Z

Halldór getur ekki gengið og á erfitt með andardrátt, en er samt sáttur.

Halldór Ellertsson þrítugur dansari frá Blönduósi hefur sett Íslandsmet, ef ekki heimsmet í áti en hann át á dögunum tvö fullvaxin hross ásamt 103 kílóum af kartöflum og 22,5 lítrum af jafningi.
"Ja, þetta var svona eiginlega bara í gríni sko" sagði Halldór hlæjandi um átið. "Við félagarnir vorum í fótbolta á föstudaginn síðasta og eftir leikinn sagðist ég vera svo svangur að ég gæti étið heilan hest og annan til. Strákarnir tóku mig sko strax á orðinu og mönuðu mig til að éta hestana ha ha ha!"

Hrossin fékk Halldór úr hesthúsi sínu og konu sinnar og var annar hesturinn, Bleki frá Stað, m.a. margverðlaunaður kynbótahestur. Aðspurður sagði Halldór að eiginkona hans hafi ekki tekið þessu uppátæki vel, enda var hún ekki spurð álits áður, og hefur hún þegar krafist skilnaðar. Halldór segist hins vegar vera ánægður en hann hafi staðist áskorun félaga sinna með prýði og fái nú heilmikið "respect" frá þeim, slíkt sé honum meira virði en einhver bévítans eiginkona og heilsa, eins og hann orðaði það sjálfur. Halldór segist hissa á neikvæðum viðbrögðum fólks vegna málsins og vill hann varpa fram þessari spurningu til almennings: "Ég meina sko, af hverju er fólk að segjast vera svo svangt að það geti étið heilan hest, ef það lætur svo ekki verða af því? Asnalegt finnst mér sko."

Sprengdi sjálfan sig í loft upp vegna skopmyndar

2006-03-01T18:26:00.000Z

Það var ekki mikið eftir af Ibn eftir sprenginguna.

Ibn Abu Hassan, 32 ára múslimi frá Saudi Arabíu, sprengdi sjálfan sig í loft upp á heimili sínu að Lækjarsmára 5 í gærmorgun. Sprengjan var ekki öflug og sakaði engan annan fyrir utan blindan hamstur Ibn sem missti framlöpp í sprengingunni. Að sögn vitnis ku ástæða sprengingarinnar vera sú að Ibn teiknaði óvart skopmynd af Múhameð spámanni er hann vann sem myndasöguteiknari fyrir Morgunblaðið og "missti sig óvart" í öllum látunum út af skopmyndum Jótlandspóstsins danska á dögunum.

Ibn hafi ákveðið að útbúa sprengju til að refsa manninum sem teiknaði skopmynd af spámanninum og fattaði ekki fyrr en of seint að það var hann sjálfur, með fyrrgreindum afleiðingum. Þetta mun þó ekki vera í fyrsta skipti sem Ibn beitir refsiaðgerðum vegna brota gegn trú sinni, en fyrir ári síðan grýtti hann læðu nágranna síns til bana fyrir að "haga sér eins og hóra" eins og hann kallaði það sjálfur.

Kanarífugl með hálsbólgu!

2006-03-01T18:03:00.000Z

Palli braggast bara nokkuð vel.

Hinn ársgamli kanarífugl Palli, sem er í eigu Báru Eggertsdóttur fiskvinnslukonu í vesturbænum, sýktist af hálsbólgu í síðustu viku. Að sögn Báru tók hún fyrst eftir því á föstudaginn síðastliðinn að Palli söng ekkert eins og vanalega þegar hún kom heim úr vinnu. "Já fyrst var ég ekkert að spá í þessu sko, en svo um kvöldið fór ég að verða áhyggjufull og hrindi í dýralækninn og þegar hann kom sá hann strax að vesalings Palli var með hálsbólgu!"

Sagði Bára kjökrandi um kvöldið örlagaríka. Aðspurður taldi dýralæknirinn þó miklar líkur á að Palli yrði frískur fljótlega og ekki þyrfti að hafa áhyggjur.

Aftur á móti hefur landlæknisembættið brugðist harðlega við þessari fregn og hefur hækkað viðvörunarstigið í 5, sem þýðir "Stórkostleg hætta!". Hafa yfirvöld fyrirskipað að lóga skuli öllum fuglum á Íslandi, sérstaklega furðufuglum, og er almenningi gert skylt að halda sig innandyra næstu 3 mánuðina vegna hugsanlegrar smithættu af fuglskvikindinu.

Greindur Framsóknarmaður uppgötvast

2005-04-12T14:54:00.000Z

Myndin sýnir hvar framsóknarbakterían heldur til.

Guðmundur Þorkelsson heilaskurðlæknir á Landsspítalanum við Hringbraut, gerði óvænta uppgötvn á dögunum er hann skannaði heila sjúklings síns. Sjúklingurinn, sem er fiskverkunarkona á fimmtugsaldri, hafði nefnilega tjáð honum að hún væri framsóknarmaður, sem er svo sem ekki í frásögur færandi nema hvað hún reyndist vera með óvenju mikla greind miðað við flokkssystkini sín.

"Já ég varð nú frekar hissa þegar ég sá myndirnar, hún virðist vera með greind á við venjulegan mann!" Sagði Guðmundur undrandi um rannsóknina og bætti við að hann hefði rennt konunni þrisvar sinnum gegnum heilaskannann til að fyrirbyggja að um mistök væri að ræða.
Þykir þetta vera tímamótauppgötvun í stjórnmálafræðum og mun marka þáttaskil fyrir Framsóknarflokkinn, þar sem annálað hefur verið um áraraðir að einu meðlimir þess flokks séu eintómir hálfvitar.
Konan, sem ekki vill láta nafns síns getið hefur þó gefið það í skyn að hún hyggist ekki kjósa Framsókn í næstu kosningum.

Prófessor bjargað úr svartholi

2005-03-04T13:01:00.000Z

Einar étur í dag ekkert nema banana og skemmtir sér við að kasta saur í fólk.

Einar Guðmundsson eðlisfræðiprófessor við Háskóla Íslands, sem sogaðist inn í svarthol fyrir um mánuði síðan (sjá má fréttina hér), hefur skilað sér til baka.
Fékk hann far hjá geimverum frá plánetunni Xt-S98i sem Landhelgisgæslan hafði samband við gegnum stjörnusambandsstöð sína á Snæfellsjökli.

Að sögn lækna sem rannsökuðu Einar mun honum ekki hafa orðið meint af ferðalaginu og er að flestu leyti eins og hann á að sér að vera, fyrir utan breytt litarhaft auk þess sem hann telur sig vera simpansa.

Fundaði með háttsettum ráðamönnum

2005-03-01T21:04:00.000Z

Ársæll er einnig góður vinur Páfans og fóru þeir síðasta sumar í tívolíið við Smáralind.

Ársæll Pétursson byggingaverkamaður úr Kópavogi kveðst hafa haldið leynilegan fund með nokkrum valdamestu mönnum heims, á heimili sínu að Hlíðarsmára 5 í fyrradag. Segir Ársæll að meðal gesta hafi verið sjálfur George Bush bandaríkjaforseti, Tony Blair forsætisráðherra Breta, Vladimír Pútín rússlandsforseti og Megas.

Ársæll hefur neitað að tjá sig um tilefni eða niðurstöðu fundarins við fjölmiðla og segir það vera "Top secret". Hins vegar hafði hann það um málið að segja að mikil samstaða hafi verið með fundarmönnum og árangur fundarins muni koma í ljós á næstu mánuðum.

Neitar að fá sér GSM

2005-02-24T11:36:00.000Z

Þorkell notar ekki tölvupóst og hann horfir ekki á DVD.

Þorkell Þorsteinsson, hæstaréttarlögmaður þvertekur algerlega fyrir að fá sér GSM síma þrátt fyrir að nánast allir landsmenn eigi slíkt tæki.
Þorkell heldur því fram að GSM símar séu "bölvuð djöflatæki" og ræni úr fólki sálinni. Ennfremur segir hann að ríkisstjórnin nýti sér djöfullegar bylgjur símanna til að koma kommúnískum áróðri sínum á framfæri til undirmeðvitundar hins grunlausa almúga.

Til að verja sig fyrir áhrifum GSM símanna hefur Þorkell klætt íbúð sína að innan með álpappír og sellófan, sem hann segir að hrindi bylgjunum frá. Utandyra kveðst hann klæða höfuð sitt með álpappír til að verja sig.

"Þeir ná mér ekki, það er sko alveg víst." Sagði Þorkell um málið. "Ég sé við öllum þeirra brögðum sko. Þeir eru allsstaðar, maður verður sko stöðugt að vera á varðbergi."

Var skilin útundan

2005-02-22T19:25:00.000Z

Siv segist sko ekki ætla að leyfa Brynjukonum að prufa mótorhjólið sitt.

Siv Friðleifsdóttir fyrrverandi umhverfisráðherra er í fýlu þessa dagana eftir að Framsóknarkonur í kvenfélaginu Brynju buðu henni ekki í partý sem þær héldu á dögunum þrátt fyrir að vera "aðalgellan" í flokknum að eigin sögn.

Hins vegar buðu þær Valgerði Sverrisdóttur sem Siv segir að sé ekki næstum því jafn "Hot" og hún sjálf, þrátt fyrir hið ofursexý sturtuatriði hér um árið.

"Þær eru sko ekki vinkonur mínar lengur," sagði Siv önuglega við blaðamann. "Að dirfast að taka þessa gömlu beyglu fram yfir mig. Glætan skiluru!"

Hryðjuverkasamtök lýsa yfir ábyrgð á eldsvoða

2005-02-14T22:04:00.000Z

Hryðjuverkamenn um allan heim fögnuðu eldsvoðanum í skiptistöðinni.

Íslömsku hryðjuverkasamtökin Asnar Islam undir forystu hins herskáa Írana Mohammad Sallad, hafa opinberlega lýst ábyrgð á eldsvoðanum í skiptistöðinni við Digranesveg í Kópavogi í gærkvöld.
Birtu þeir yfirlýsingu þess efnis á síðunni Barnaland.is skömmu fyrir hádegi í dag, ásamt því að birta þar hvatningu til íslenskra karlmanna um að dangla í konur sínar öðru hvoru.

Í yfirlýsingunni segir meðal annars að dagurinn "mikli" muni senn renna upp, þegar strætókerfi höfuðborgarinnar lamist og allir verði of seinir í vinnuna. Þá muni Allah sigra.

Ástæða árásarinnar ku vera sú að hetja hryðjuverkamanna, Osama Bin Laden hafi verið staddur hér á landi fyrir skömmu í gervi aldraðrar konu og lenti hann í því að bíða í 6 mínútur við umrædda skiptistöð, í grenjandi rigningu, eftir strætó sem seinkaði vegna umferðar.

Sogaðist inn í svarthol

2005-02-09T20:28:00.000Z

Myndin sýnir svartholið hans Einars og rauða örin bendir á staðinn þar sem talið er að hann hafi lent

Einar Guðmundsson, eðlisfræðiprófessor við Háskóla Íslands varð fyrir því óláni í fyrradag að sogast inn í svarthol sem opnaðist óvart er hann var að sýna nemendum sínum "dulítið sniðugt" eins og hann orðaði það.

Talið er að Einar hafi í kjölfarið endað á plánetunni xT78 í sólkerfinu GAP-809 sem staðsett er í 16 milljón ljósára fjarlægð frá jörðu.

Að sögn eins nemanda hans var Einar að skjóta PT-geisla úr afleiddri rafgasforþjöppu inn í kjarna Sesíum eindar sem geisluð var með segluðum öreindaþétti, þegar jónadrifið í óm-magnaranum gaf sig með þeim afleiðingum að Einar sogaðist inn í svarthol er myndaðist skyndilega.

Fyrirhugað er að senda þyrlu Landhelgisgæslunnar TF-Líf á vettvang til að leita Einars.

Herskáir Grímseyjingar gera árás á Ísland

2005-02-02T09:53:00.000Z

Mannfræðingar telja að Grímseyjingar stundi mannát.

Fimm félagar úr samtökum öfgasinnaðra Grímseyjinga réðust inn í verslun ÁTVR á Húsavík í gærdag. Rændu þeir þar 16 flöskum af íslensku brennivíni og nokkrum krukkum af neftóbaki. Einnig rændu þeir tveimur pólskum fiskvinnslukonum og höfðu á brott með sér í forláta árabát er þeir höfðu siglt á frá Grímsey.

Er talið að þetta sé fyrsta aðgerð þeirra í hernámi Íslands, en Grímseyjingar hafa hótað slíku síðustu 53 ár.

Þrátt fyrir að herför gærdagsins sé alvarlegasta árásin sem sem Grímseyjingar hafa gert á Ísland, er ekki víst að um þá fyrstu sé að ræða. Fyrir um fimm árum var þremur rollum og tveimur hænum rænt frá bæ í nágrenni Húsavíkur og er talið að um herskáa Grímseyjinga hafi verið að ræða.

Skip Landhelgisgæslunnar hefur verið sent á vettvang með 16 vopnaða sérsveitarmenn og Björn Bjarnason stríðsmálaráðherra innanborðs, en óvíst er að þeir finni Grímsey, því hún hefur verið týnd frá því að mikla þoku gerði á svæðinu fyrir 20 árum.

Mælir ekki með þráðlausu neti

2005-02-01T10:27:00.000Z

Árni benti á að fiskar kunni ekki á internetið.

Árni Mathiesen sjávarútvegsráðherra hefur gefið út yfirlýsingu þess efnis að þráðlaust net sé með öllu gagnslaust.

Árni var á alþjóðlegri ráðstefnu um sjávarútvegsmál í Kaupmannahöfn um helgina og ákvað hann því að kynna skýrslu sem ráðuneytið lét gera nýverið um gagnsemi þráðlauss nets í sjávarútvegi.

Að sögn Árna voru niðurstöður skýrslunnar sláandi og segir hann þær marka tímamót í íslenskum sjávarútvegi.

"Í ljós kom að það er ekki nokkur einasti möguleiki á að ná fiski í þessi þráðlausu net. Þessi tíska að fá sér þráðlaust net er eingöngu sóun á fé, fólk ætti frekar að fá sér almennileg net ef það ætlar að veiða eitthvað."

Árni viðurkennir þó möguleikann á að hægt sé að "veiða" sér maka gegnum internetið en þar með séu veiðimöguleikarnir ekki fleiri.

Átti fótum sínum fjör að launa

2005-01-25T20:00:00.000Z

Fætur Magnúsar eru partýfrík.

Magnús Guðsteinsson húsamálari úr Vesturbænum ákvað að gera sér og fótum sínum dagamun og skella sér í danstíma hjá hinum virta rússneska ballettdansara Viktor Smirinoff. Hann mun vera þar næstu þrjá mánuði í æfingu fyrir uppfærslu dansfélags Hrafnistu á Svanavatninu í apríl.

"Þetta er sosum ágætt þó svo að ég hafi ekki mikinn áhuga fyrir þessu, en hins vegar eru fæturnir á mér að fíla þetta í botn! Þeir eiga það líka skilið blessaðir." Sagði Magnús í undarlegu símaviðtali við blaðamann.

Magnús sagði að hann hefði fyrir nokkru staðið og beðið fyrir framan Hagkaup í Kringlunni í tvo tíma til að komast á útsölurnar. En svo hafi fætur hans verið alveg úr sér bræddir eftir að hann hafði rölt um verslunina í sjö og hálfan klukkutíma til viðbótar.
"Þeir fóru í fýlu eftir Hagkaupsferðina. Sannkallaða táfýlu hahaha!" Bætti Magnús við. "Svo fékk ég þá nú til að tala við mig aftur og lofaði að gera eitthvað skemmtilegt fyrir þá í staðinn og þá sögðust þeir vilja fara í ballett. Þá var ekki aftur snúið."

Kom sér á óvart

2005-01-25T13:24:00.000Z

Margrét er búin að vera í megrun í 18 ár og þetta er fyrsta merkið um árangur.

Margréti Óskarsdóttur, 35 ára húsmóður úr Garðabænum var svo sannarlega brugðið á dögunum eftir að hún kom sjálfri sér ískyggilega á óvart.
"Vá skiluru! Þetta kom svo óvænt og alveg úr hörðustu átt sko!" Sagði Margrét og var greinilega ennþá að ná sér af geðshræringunni sem greip hana við atvikið.

Aðspurð um það hvað vakið hafði þessa geðshræringu segist hún hafa verið nývöknuð og steig á baðvogina eins og hún gerir alltaf á hverjum morgni og sá hún gegnum stýrurnar dulítið sem sló hana algjörlega úr jafnvægi.
"Úff! Ég ætlaði ekki að trúa þessu og er varla að trúa þessu ennþá! Ég léttist um 1 kíló!" Sagði Margrét að lokum sigri hrósandi.

Hún ætlar að halda upp á kílóamissinn með því að fara ásamt vinkonum sínum á McDonalds og fá sér "einn stóran" eins og hún kallar það.

Ísland er raunverulega bananalýðveldi.

2005-01-24T10:14:00.000Z

Kátur og félagar átu alla bananana sem settir voru við Alþingishúsið á dögunum.

Meint ríkisstjórn Íslands undir stjórn Djöfla-Dóra hefur sagt af sér eftir að í ljós kom að ríkisstjórnin hafði aldrei stjórnað þennan tíma, heldur tók við skipunum frá hóp apa sem undir forystu simpansans Káts hefur í raun verið við völd á Íslandi síðastliðin 15 ár.
Hefur þetta hneyksli skekið þingheiminn síðan það uppgötvaðist fyrir um hálftíma síðan á fyrsta fundi Alþingis eftir jólafrí.

Aðdragandi afsagnarinnar má rekja til þess er Steingrímur J Sigfússon, formaður Vinstri-Grænna sagði í þingræðu sinni að Ísland væri orðið bananalýðveldi eftir að hafa verið undir stjórn Davíðs og brúðunnar hans; Dóra. Eftir ummæli Steingríms stóð Halldór Ásgrímsson upp úr sæti sínu með tár í augunum, viðurkenndi sannleikann og sagði af sér, svo hljóp hann kjökrandi út úr þingsal ásamt hinum meðlimum hinnar fyrrverandi ríkisstjórnar. Stuttu síðar kom hópur simpansa inn í þingsal og settist glottandi í stóla ráðherranna og fór að kasta saur í þingforsetann Halldór Blöndal. Apastjórnin setti samstundis fram frumvarp þess efnis að álagning og innflutningsgjöld á bönunum verði afnumin.

Þingmaður kann ekki mannasiði

2004-12-11T01:55:00.000Z

Mörður ullaði framan í myndavélina.

Mörður Árnason þingismaður Samfylkingar hefur verið skikkaður af menntamálanefnd til að taka upp leikskólann aftur.
Þykir framkoma hans undanfarna daga hafa verið fyrir neðan allar hellur og borið vott um litla þekkingu hans á mannasiðum.
"Ég var að tala og svo greip hann framí og gaf mér fokk-merki!" Sagði rektor Háskóla Íslands kjökrandi í símaviðtali við blaðamann.

Rektor sagði svo að Mörður hafi ítrekað kallað hann fitubollu og gert grín að hárinu á honum á fundi sínum með rektorum ríkisháskólanna á dögunum. Rektor segist ennfremur hafa læst sig inni í herberginu sínu og grenjað í þrjá tíma eftir fundinn vegna svívirðlegs dólgsháttar og dónaskaps Marðar.
Aðspurður segir búálfurinn Össur Skarphéðinsson að Mörður hafi lagt sig í einelti frá því að hann gekk í flokkinn. Össur segist margsinnis hafa grátið sig í svefn yfir framkomu Marðar.
"Hann er alltaf að toga í skeggið á mér og ropa upp í eyrað á mér! Mig langar að reka hann úr flokknum sko... bara þori því ekki!" Sagði Össur mjóróma.

Mörður á að mæta ásamt pabba sínum í viðtal hjá leikskólanum Tjarnarborg á morgun klukkan 9 og mun hann sitja 3 tíma á dag í hlýðninámsskeiði og mannasiðum hjá leikskólastýrunni Huldu Ásgeirsdóttur.

Er ekki sáttur

2004-12-08T01:44:00.000Z

Pavlo getur bara ekki sætt sig við veröldina í dag.

Pavlo Smirnoff, innflytjandi, er alls ekki ánægður þessa dagana, en hann varð fyrir miklum vonbrigðum í síðustu viku.
"Ék er mikið dapúr í dak, ekert gaman." Sagði Pavlo orðrétt í viðtali við blaðamann. Pavlo sagðist vera yfirleitt mjög hress maður og hýr á brá, en nú hafi hann bara alls ekki getað brosað. Pavlo segir ástæðu vonbrigðana vera þá að hann hafi einfaldlega búist við meiru en annað hafi svo komið á daginn.

Pavlo vonast til að hressast á næstu dögum en hann er ekki bjartsýnn um það.

Undarlegur ættbálkur uppgötvaður

2004-12-06T01:57:00.000Z

Skagastúlkurnar þyrptust í kringum leiðangursmenn með þvílíkum frygðarópum.

Leiðangur undir stjórn Einars M. Norðdal, mannfræðings, hefur uppgötvað frumstæðan ættbálk á skaga sem teygir sig út í Faxaflóa, mitt á milli Hvalfjarðar og Borgarfjarðar. Fannst Einari því við hæfi að kalla þá Skagamenn.
Mun þessi ættbálkur vera afar frumstæður og virðist afkoma þeirra byggjast á fiskveiðum og bræðslu á einhverskonar fiskimjöli. Sér til dægrastyttingar stunda Skagamennirnir einhverskonar boltaspark eða "fótbolta" eins og Einar vildi kalla þennan undarlega leik. Þá eru tveir 11 manna hópar sem reyna að sparka einhverskonar leðurtuðru í net sem strengt er á milli tveggja stanga.

Einar og leiðangursmenn hans dvöldu í fimm daga meðal Skagamannanna til að læra meira um menningu þeirra. Að sögn Einars virðist þankagangur Skagamannanna vera takmarkaður við fisk, fótbolta, drykkju og slagsmál, sem ber vott um frumstæða greind þeirra. Einnig virðast kvenkynsmeðlimir ættbálksins vera afar lausir í rásinni og reyndu ákaft að koma leiðangursmönnum til.
Sögusagnir um tilvist ættbálksins hafa að vísu gengið manna á milli í Melasveitinni um árabil og hafa nokkrir bændur fullyrt að undarlegar verur áþekkar mönnum hafi rænt frá þeim sauðfé um þónokkurt skeið. Þó hafa ekki borist haldbærar sannanir á tilvist ættbálksins fyrr en nú.

Einar hefur gengið svo langt að telja að hér sé um týnda hlekkinn milli manna og apa að ræða og segir hann því þetta afar merkilegan fund.

Ætlar að setjast í helgan stein.

2004-12-05T19:40:00.000Z

Hansína vonar að nóg pláss verði í steininum fyrir saumadótið hennar.

Hansína Viðarsdóttir 85 ára gömul saumakona úr Kópavogi, hefur ákveðið að setjast í helgan stein. Að hennar sögn hefur það lengi verið uppi á pallborðinu að hún fái sér sæti í hinum helga steini, eina vandamálið var bara það að hún fann ekki þennan stein fyrr en í fyrradag og því mun hún setjast í hann á morgun.

Í tilefni af því mun Hansína bjóða upp á kaffi, kleinur og "þvottekta smörrebröd" eins og hún orðaði það sjálf, á heimili sínu að Lækjarsmára 4 um hádegisbil á morgun. Allir velunnarar eru velkomnir.

Hansína mun svo setjast í helga steininn klukkan 10 mínútur yfir 4 á morgun, við undirspil lúðrasveitar elliheimilisins að Hrafnistu.

Kúkaði í buxurnar

2004-12-03T21:04:00.000Z

Kristján frussaði af hlátri yfir ódæðinu.

Kristján Jóhannsson söngvari varð fyrir því óláni að kúka í buxurnar þegar hann var að syngja á styrktartónleikum krabbameinssjúkra barna í síðustu viku. Að sögn tónleikagesta var hann að rembast við háa C-ið og var hann orðinn rauður í framan, þegar alltí einu kom á hann undarlegur svipur.
"Já sjitt, alltí einu kom bara gat á buxurnar hans og flennistórt stykki þeyttist í gólfið!" Sagði hneyksluð kona í viðtali við blaðamann. Að hennar sögn brást Kristján hinn hressasti við, tók upp stykkið og kastaði því í Birgittu Haukdal sem flúði grátandi af sviðinu í kjölfarið.

"Svo tók hann uppá því að valhoppa um sviðið með þvílíkum apalátum!" Bætti konan við. Kristján Jóhannson hefur neitað að tala við blaðamenn út af málinu, en talsmaður hans heldur því fram að Íslendingar séu svo miklir sveitalubbar og bavíanar að sögn Kristjáns að þeir eigi ekkert betra skilið.

Kveðst vera djöfullinn sjálfur

2004-12-03T14:17:00.000Z

Halldór (SATAN) kvaðst munu bíta hausinn af hverjum þeim er kallar hann gungu eða druslu.

Meintur forsætisráðherra Íslands, Halldór Ásgrímsson viðurkenndi í gær að ásakanir þær er á hann hafa verið lagðar af hálfu stjórnaranstöðunnar undanfarið, eigi við rök að styðjast. Hefur Halldór viðurkennt að hann sé djöfullinn sjálfur.
Í kjölfarið reyndi blaðamaður ákaft að ná viðtali við Halldór en talsmaður hans hjá forsætisráðuneytinu sagði að hann hefði snúið í stutta heimsókn til Írak til að safna sálum fallinna hermanna. Samkvæmt talsmanni Halldórs er George Bush í miklu uppáhaldi hjá Halldóri, en samkvæmt fornum spádómi mun Bush hjálpa Dóra við að skapa helvíti á jörðu.

Grunsemdir um hið rétta eðli Halldórs hafa blundað í stjórnarandstöðumönnum í fjölda mörg ár, en það var fyrst í síðustu viku sem staðfesting fékkst á ásökununum, en síðasta föstudag varð þingvörður vitni að því er Halldór brýndi horn sín á klósettinu í Alþingishúsinu. Í kjölfarið ákvað Halldór að opinbera sitt rétta andlit í utandagskrárumræðum á Alþingi í gær.

Er afi sjálfs sín

2004-12-02T22:21:00.000Z

Þorsteinn telur ekki að hann sé neitt skrítinn þrátt fyrir skyldleikaræktun í fjölskyldunni.

Þorsteinn Eggertsson ættfræðingur hefur í rannsóknum sínum komist að ansi hreint merkilegri niðurstöðu. Hann telur sig hafa sannanir fyrir því að hann sé afi sjálfs sín.
"Sko, langafi minn var giftur dóttur ekkju sinnar og átti með henni tvö börn. Annað þeirra var kviðmágur frænda síns sem jafnframt var hálfbróðir dóttur móður minnar og hálfsystur. Ekkja langafa míns giftist síðar hálfbróður dóttur sinnar sem var faðir minn og er því langamma mín jafnframt stjúpmóðir mín og eignuðust þau saman barn sem er hálfbróðir minn í dag. Ég giftist síðan hálfsystur sonar langömmu minnar sem jafnframt gerir það að verkum

að ég er orðinn stjúpfaðir föður míns. Þannig séð er ég í raun afi minn." Sagði Þorsteinn stoltur í stuttu samtali við blaðamann.

Frumvarp um myndun hers

2004-11-24T15:05:00.000Z

"Dómsdagstækið" hans Björns.

Björn Bjarnason dómsmálaráðherra hefur lagt fram frumvarp á Alþingi um myndun "íslenska lýðveldishersins" sem sjá mun bæði um varnir landsins og að gera árásir á óvini Bandaríkjanna.
"Við þurfum að sýna fram á hvað við erum stórir kallar fyrir stóru strákunum." Sagði Björn glottandi við blaðamann meðan hann klæddi sig í forláta hringabrynju.

Björn hefur einnig tilkynnt að hann hafi landað góðum samningi við hergagnaframleiðanda í Svíþjóð og eru nú þegar í framleiðslu 12 "dómsdagstæki" eins og Björn orðaði það. Einnig mun blikksmiðja Friðriks á Neskaupsstað sjá um framleiðslu herklæða, skjalda og handvopna. Íslenski hesturinn verður svo notaður til að flytja hermenn milli staða á landi.

Samkeppnisstofnun rannsakar fréttamiðlana

2004-11-12T19:12:00.000Z

Fréttamiðlarnir virðast ávallt birta sömu fréttirnar.

Eftir fádæma velgengni í að koma upp um óþokkana í olíufélögunum hafa öðlingarnir hjá Samkeppnisstofnun fyllst eldmóði og eru nú með nýtt mál í höndunum.
"Við höfum fengið ábendingar um það að fjölmiðlarnir og þá sérstaklega fréttamiðlarnir séu með leynilegt samráð sín á milli. Okkur þykir ástæða til að rannsaka hvers vegna fréttamiðlarnir birta alltaf sömu fréttirnar og keppinautarnir." Sagði Kristín Flygenring formaður Samkeppnisráðs í viðtali við blaðamann og benti um leið á forsíður Morgunblaðsins og Fréttablaðsins þar sem í báðum blöðunum var frétt um andlát Arafats.

"Það eru til fullt af fleiri dæmum um þetta, sjáðu bara fréttirnar um samráð olíufélaganna. Það eru öll blöðin með þetta."
Kristín segir samkeppnisráð munu vinna í þessu máli dag og nótt, og gera hvað sem í þeirra valdi stendur til að gera ennþá flottari skýrslu en um olíufélögin.
"Þessi verður sko 2000 blaðsíður!" Sagði Kristín brosandi að lokum.

Prestur á gjörgæsludeild

2004-11-08T15:22:00.000Z

Séra Gunnar fyrir barsmíðarnar.

Séra Gunnar Björnsson sóknarprestur á Selfossi liggur um þessar mundir inni á gjörgæsludeild Landsspítalans í Fossvogi eftir að hafa verið barinn heiftarlega af kollegum sínum í gær.
Mun ástæða barsmíðanna vera sú að séra Gunnar hefur sýnt starfi Biskups mikinn áhuga, en gamall íslenskur siður segir að enginn verði óbarinn biskup, og því tóku kollegar hans á suðvesturhorninu upp á því að vígja hann til biskups með því að berja hann af krafti þar til hann missti meðvitund.

"Þetta höfum við allir þurft að ganga í gegnum."

Sagði starfandi biskup yfir Íslandi, herra Karl Sigurbjörnsson í viðtali við fréttamann í gær. Herra Karl Sigurbjörnsson vildi lítið tjá sig að öðru leyti um málið, en segir að þetta sé fullgildur og fullkomlega eðlilegur siður, hann hafi sjálfur verið í tvo mánuði að ná sér eftir þær barsmíðar sem hann þurfti að ganga í gegnum á sínum tíma.
Hefur þessi siður viðgengist í aldaraðir og eru þess tvö dæmi í Íslandssögunni að biskupar hafi látið lífið vegna þessarra barsmíða. Enginn veit hvers vegna þarf að berja biskupana, en hins vegar er það augljóst að prestarnir hafa mjög gaman af því og segjast aðspurðir fá svakalegt "kick" út úr því.

Nýtt myndband frá Bin Laden

2004-11-08T14:16:00.000Z

Osama segist vera á móti ofbeldi, hann langar bara til að dansa.

Athafnamaðurinn Osama Bin Laden hefur sent frá sér nýtt myndband, sem hann hefur unnið ásamt kærastanum sínum Mohammed Sallad. Mun nýja myndbandið sýna Binna í nýju ljósi, en hann hefur haft af því áhyggjur undanfarið að almenningsálitið á honum sé frekar neikvætt.
"Mér finnst svo leiðinlegt hvað allir eru á móti mér, ég á það meira að segja til að gráta mig í svefn." Sagði Osama klökkur í símaviðtali við blaðamann.
"Það halda allir að ég sé vondur! En ég er góður strákur í alvörunni, ég meina ég á lítinn kettling sem ég er alltaf að knúsa, hann er svo mikil dúlla."

Osama segist vera friðelskandi persóna sem hafi yndi af ljóðum, en það sé bara svo erfiður heimur sem hann býr í að hann þarf að þykjast vera einhver vondur karl til að vinir hans fari ekki að gera grín að honum. Hann segist hafa verið lagður í einelti þegar hann var lítill af því að hann hafði aldrei drepið mann né nauðgað eða barið konu.
Nýja myndbandið hans Osama sem ber nafnið The terrorist and the beast, er dans og söngvamynd, sem fjallar um fallegu hryðjuverkaprinsessuna Osama sem er fangi í helli og vondan galdrakarl sem heitir Bush og er að reyna að klófesta hana. Svo kemur fagur prins sem hyggst bjarga Osama, með því að eyða heiminum, svo að þau geti lifað hamingjusöm til æviloka.
Myndin verður sýnd í ríkissjónvarpinu snemma á næsta ári.

Nylon stelpa prumpaði

2004-11-04T10:35:00.000Z

Stúlknabandið Nylon hefur ekki ennþá gefið út yfirlýsingu vegna atviksins.

Sá merkilegi atburður gerðist í Kringlunni í gær að ein af stelpunum í Nylon, sem voru að árita geislaplötu sína, rak við.
María Jóna Viðarsdóttir húsmóðir, varð vör við aftansöng Nylon-stelpunnar, er hún var að láta hana árita plötu fyrir dóttur sína.
"Jeminn, hún sat bara þarna ósköp venjuleg að sjá, svo allt í einu heyrðist bara smá prump eins og þruma úr heiðskýru lofti! Ég vissi bara ekki hvað ég átti að gera, þetta var svo óvænt!"

Sagði María skelfingu lostin í viðtali við blaðamann. María sagði aðspurð að stúlkan hefði þó verið kurteis og beðist afsökunar á ódæðinu.

Þykja þessi merkilegu tíðindi benda til þess að Nylon stúlkurnar séu mannlegar, þrátt fyrir þrálátan orðróm Einars Bárðarsonar athafnamanns, þess efnis að þær séu gyðjur.

Neitar að láta taka sig

2004-11-04T08:54:00.000Z

Gísli fussaði og sveiaði yfir gíslatökumönnunum.

Gísli Sigfússon verslunarmaður, hefur komið fram fyrir hönd samnafna sinna og segist vera orðinn hundleiður á því að vera alltaf tekinn af gíslatökumönnum, hann hefur einfaldlega ekki tíma til þess.
"Já, mér finnst þetta frekar ósanngjarnt. Af hverju þurfa þessir menn endilega að taka gísla? Geta þeir ekki tekið Árna eða Sigurða í staðinn?" Sagði Gísli gremjulega í samtali við blaðamann.

Gísli og samnafnar hans hafa ákveðið að neita að láta taka sig ef þetta fari ekki að breytast.

"Ég hef þurft að þola hellings vinnutap útaf þessum gíslatökum, og svo eru þessir hrottar í Írak alltaf að drepa Gíslana. Þetta er gjörsamlega óásættanlegt og þess vegna höfum við ákveðið að hætta að láta taka okkur."

Gísli hefur þurft að þola yfir 50 gíslatökur í gegnum tíðina, en hefur þó enn ekki verið tekinn í Írak. Einnig hefur lögreglan tvisvar tekið Gísla, fyrir of hraðan akstur.

Bandaríkin segja Íslandi stríð á hendur

2004-11-03T01:13:00.000Z

Bush var harðorður í garð íslenskra öfgamanna í ræðu sinni í gær.

George W. Bush, Bandaríkjaforseti tilkynnti Bandarísku þjóðinni í gærkvöld að hann ætlaði að ráðast inn í Ísland og útrýma hryðjuverkaógn íslenskra öfgamanna, ef hann yrði kjörinn forseti.
Forsetinn sagði í blaðaviðtali í morgun að honum hefði borist til eyrna að íslenskir öfgamenn hefðu staðið að hryðjuverkum á hernámsliðið í Írak að undanförnu. Auk þess hefur hann áreiðanlegar upplýsingar fyrir því að íslensk öfgasamtök hyggi á árásir í Bandaríkjunum líkt og 11. september 2001.

Davíð Oddsson utanríkisráðherra og brúðumeistari, telur að málið sé allt á misskilningi byggt. Bush hafi ruglast á orðinu íslömsk og íslensk, og þetta sé því bara smávegis klúður.
Ekki náðist að hafa samband við sendiráð Bandaríkjanna hér á landi út af málinu, þar sem skrifstofa þess og öll starfsemi hefur verið flutt yfir á Keflavíkurflugvöll. Auk þess ruddust Bandarískir hermenn inn í sendiráð Íslands í Bandaríkjunum og handtóku sendiherrann.
Aðspurður um yfirvofandi stríð er Björn Bjarnason dómsmálaráðherra frekar spenntur, hann tók á móti blaðamanni íklæddur felubúningi og með stríðsmálningu í framan.
"Látum kvikindin koma, við erum með varðskipin og sérsveitina!!" Sagði Björn og brosti.
Stríðið hefst á morgun klukkan 3, þegar Bush er búinn í grunnskólanum.

Fann lausn gegn verðrýrnun á markaði

2004-11-01T21:58:00.000Z

Jóhann segist ekki borða banana, en hann á samt hund.

Jóhann P. Laxdal dósent í hagnýtum markaðstengdum vísitöluspám, við Háskólann í Mierde á Spáni, hefur þróað og framsett nýja leið til að lágmarka skerðandi áhrif verðbólgu á markaðsverð fyrirtækja. Hann hefur ekki stigið út af skrifstofu sinni undanfarin 2 og hálft ár, þar sem hann hefur verið að vinna baki brotnu við rannsóknir sínar.

Kenning Jóhanns, sem hann kallar einfaldlega ”lögmálið um И” er að hans sögn afar einföld og útskýrði Jóhann meginefni kenningar sinnar í stuttu samtali við blaðamann:

”Sko, heildarlausnir háðar vandkvæðum heildstæðrar og hlutlægrar þróunar virðisrýrnunar fastafjármuna á markaði eru forsenda samþjöppunar á efnahagslegum grunni þeirra forsenda sem myndast út frá þeim sjónarmiðum sem taka til grunnþátta áhrifaríkrar úrlausnar. Þannig skapast vinnsluumhverfi sem í ríkum mæli gefur til kynna heildarsýn á þær tilfallandi breytur þess viðfangsefnis sem greina á hverju sinni. Út frá betagreiningu má ná fram cóvaríans ásamt nettó núvirði þeirra heildstæðu lausna sem ekki eru háðar þrengingum á fjármálamarkaði. Með því að beita brúun og vogun má skilgreina И”
Jóhann vildi ennfremur láta eftirfarandi formúlu fylgja með, þar sem hún útskýri málið enn betur: И = β(t-1) * X + (Эª/φ) ≠ σ3, þar sem β er beta gildi, σ er staðalfrávik og X er ávöxtunarkrafan.

Þess ber að geta að Jóhann er ekki með hárkollu þrátt fyrir þráláta kjaftasögu þess efnis hjá starfsmönnum greiningardeildar Íslandsbanka.

Ætlar að lenda á sólinni

2004-11-01T11:48:00.000Z

Ármann að stilla inn hnit samtvinnaða spíralgjörvans í ljóseindahraðlinum.

Ármann Hreiðarsson áhugamaður um eldflaugavísindi, hefur síðastliðin 3 ár unnið að smíði geimfars í bílskúrnum sínum. Við byggingu geimfarsins notaðist hann m.a. við gamla skoda bifreið, Kirby-ryksugu, 3 hárþurrkur, bilaðan örbylgjuofn og 16 rúllur af álpappír. Tilganginn með smíðinni segir Ármann vera þann að hann hyggist fljúga til sólarinnar og lenda á yfirborði hennar og vera þar með fyrstur manna til að lenda á sólinni.

Þegar blaðamaður spurði Ármann hvort geimfarið þoldi hitageislunina frá sólinni horfði hann hneykslaður á spyrjandann. ”Ég fer auðvitað að nóttu til þegar sólin er sest!” Sagði Ármann og skellihló að heimskulegri spurningu blaðamanns. Brottför hans er áætluð á morgun kl. 5 á Arnarhóli.

Kvenfélagið Matthildur mun sjá viðstöddum fyrir pönnukökum og kaffi.

Kona dæmd fyrir ofbeldi

2004-11-01T01:38:00.000Z

Sérsveitin var við öllu búin, enda um stórhættulega andstæðinga að etja.

Þrítug kona var í gær dæmd í 6 ára fangelsi, þar af 2 ár skilorðsbundið, fyrir ofbeldi og andlega misbeitingu gagnvart eiginmanni sínum.Henni er gert að sök að hafa ítrekað truflað sjónvarpsáhorf eiginmanns síns með því að byrja að ryksuga, sauma, þvo þvott eða þurrka af sjónvarpinu meðan á mikilvægum fótboltaleikjum stóð í sjónvarpinu.

Með vítaverðu hátterni sínu hafði konan reitt veslings eiginmann sinn til reiði og neytt hann til að beita þeirri einu vörn sem hann hafði, en það var að berja hana látlaust þar til hún hætti.

En í eitt skiptið er maðurinn var að sinna ”dagsskyldu” sinni, varð hann svo æstur að hann barði af öllu afli í höfuðkúpu konunnar með þeim afleiðingum að hann tvíbrotnaði á hægri hendi, auk þess sem hann skrámaðist illilega á fæti er hann sparkaði í bakið á henni. Eftir að konan hafði misst meðvitund, sá eiginmaðurinn færi á að hringja á lögreglu og kom hún innan 5 mínútna til að handtaka meðvitundarlausan óeirðarsegginn og sjá til þess að hún angraði eiginmann sinn ekki aftur.
”Úff maður, ég er feginn því að bölvuð bykkjan skuli vera komin í steininn. Ég var orðinn hundleiður á nöldrinu og frekjunni í henni, hún bannaði mér til dæmis að drekka á virkum dögum og sofa hjá öðrum konum!” Sagði eiginmaðurinn skjálfandi í viðtali við blaðamann.
Dómnum þótti ástæða til að beita hámarks refsingu fyrir brot konunnar, þar sem rifbeinsbrot og ör og marblettir á líkama hennar bentu eindregið til þess að eiginmaður hennar hafi þurft að þola mikinn sársauka þegar hann barði hana.
Um 20 konur úr Bríeti létu ófriðlega og mótmæltu dómnum harkalega. Í kjölfar þess var sérsveitin kölluð út og náði að tvístra hópnum með táragasi og gúmmíkylfum.

Vildi láta endurskoða bókhaldið

2004-10-31T21:57:00.000Z

Öndin reyndi að éta ársskýrsluna sem Magnús sýndi henni.

Ómar Örn Antonsson, deildarstjóri hjá fyrirtækinu Össuri hf. var rekinn í gær með skömm.
Ástæðu uppsagnarinnar má rekja til þess er Ómar var ásamt öðrum stjórnarmeðlimum á fundi. Allt lék í lyndi þar til Ómar stóð upp úr sæti sínu og krafðist þess að fostjórinn léti endurskoða bókhald fyrirtækisins. Fundarmönnum brá að sögn illilega í brún við þessa ósk Ómars og enginn vissi hvaðan á hann stóð veðrið.

”Hann sagði bara alltí einu upp úr þurru að hann vildi láta endur skoða bókhaldið!!” Sagði Magnús forstjóri fyrirtækisins hlæjandi í viðtali við blaðið. ”Ég meina, hvað meinar hann? Er maðurinn eitthvað ruglaður? Að ætlast til þess að endur geti skoðað bókhaldið. Það er fáránlegt, ha ha ha!”
Magnús sagðist ekki telja miklar líkur á því að endur kynnu að lesa, hvað þá að lesa flókna hluti á borð við bókhaldsgögn fyrirtækisins.Þess vegna hlyti Ómar að vera andlega óheill og var hann því rekinn.

Aðspurður segir Ómar að Magnús hafi misskilið sig heiftarlega, hann hafi ekki verið að tala um neinar endur, bara að þörf væri á að yfirfara bókhaldsgögn síðustu ára.

Fann mömmu sína aftur

2004-10-29T10:41:00.000Z

Hannes segist ekki ætla að sleppa mömmu úr augsýn.

Hannes Magnússon, bókhaldari er heldur glaður þessa dagana. En hann hefur fundið móður sína á ný, eftir að hann týndist í stórmarkaði fyrir 31 ári.

"Ég týndi mömmu þegar ég var bara smá patti og sá hana svo vera að vinna í afgreiðslunni í Sorpu í gær þegar ég fór að henda sófagarminum mínum!" Sagði Hannes glaður í bragði í stuttu spjalli við blaðið.

Hann hefur allan þennan tíma alist upp hjá kanínum í Öskjuhlíðinni og segist hafa lært mikið af þeim. Á morgun ætlar mamma hans Hannesar að fara með hann í fjölskyldu og húsdýragarðinn og fá sér svo ís á eftir. Hannes hlakkar mikið til.

Lærði að lesa

2004-10-28T23:34:00.000Z

Trúir ekki lengur á jólasveininn

2004-10-28T21:34:00.000Z

Þungt haldin af þágufallssýki

2004-10-28T21:05:00.000Z

Gleymdi sér

2004-10-28T18:50:00.000Z

Nýtt afl í fjölmiðlun stofnað!

2004-10-27T19:09:00.000Z

Nú hefur göngu sína nýr kafli í íslenskri fjölmiðlasögu, þar sem í fyrsta skipti í sögu Íslands hefur algjörlega óháður fréttamiðill fengið opinbera birtingu. Ritskoðun og annað slíkt rugl mun ekki hafa nein áhrif á það efni sem hér verður birt og mun ég fyrir hönd ritstjórnarinnar votta fyrir því að sannleikans mun hér ávallt vera gætt til fullnustu.

Lifið heil,

Muddurinn